საქართველოს სახელმწიფო ფიზიკური აღზრდისა და სპორტის აკადემია

დაარსდა 1938 წელს – როგორც დამოუკიდებელი უმაღლესი სასწავლებელი, გამოეყო თბილისის სახელმწიფო უნივერსიტეტს. აკადემიის სტატუსი მიენიჭა 1994 წელს. აქვს დასწრებული და დაუსწრებელი სწავლების ფორმები, სახელმწიფო და კერძო დაფინანსების სექტორები, 1 ფილიალი, 2 კოლეჯი, მაგისტრატურა და ასპირანტურა. სწავლება ორსაფეხურიანია (ბაკალავრი, მაგისტრი). აკადემიაში არის 6 ფაკულტეტი: მწვრთნელთა (ამზადებს მწვრთნელებს სპორტის ოლიმპიურ და ძირითად არაოლიმპიურ სახეობებში), პედაგოგიური (ამზადებს ფიზიკური აღზრდის მასწავლებლებს), სამკურნალო ფიზკულტურისა და რეაბილიტაციის (ამზადებს ამ დარგის სპეციალისტებს), დაწყებითი სამხედრო მომზადებისა და ფიზიკური აღზრდის (ამზადებს დაწყებითი სამხედრო მომზადებისა და ფიზიკური აღზრდის მასწავლებლებს), იურიდიული (ამზადებს სპორტისა და ტურიზმის სამართლის სპეციალისტებს), დაუსწრებელი სწავლების (ამზადებს მწვრთნელებს, მასწავლებლებს, სამკურნალო-გამაჯანსაღებელი მუშაობის სპეციალისტებს), 17 კათედრა, 7 მეთოდური კაბინეტი, 2 სამეცნიერო-კვლევითი ლაბორატორია, 22 სასწავლო ბაზა, სპორტული კლუბი, 9 სპორტული დარბაზი, 2 სტადიონი, ჩოგბურთის კორტები, კომპიუტერული კლასი. აკადემიის კურსდამთავრებულთა შორის არიან გივი კარტოზია, ნინო დუმბაძე, ელენე გოკიელი, დავით ციმაკურიძე, მედეა ჯუღელი, ვახტანგ ბალავაძე, გიორგი სხირტლაძე, მირიან ცალქალამანიძე, ნუგზარ ასათიანი, ვიქტორ სანეევი, ლევან თედიაშვილი, ნინო სალუქვაძე, შოთა ხაბარელი და სხვა სახელოვანი სპორტსმენები. აკადემიის დირექტორები (1973 წლიდან – რექტორები) იყვნენ: თედო სხირტლაძე (1938-40), შალვა დუმბაძე (1940-41), პეტრე ჩხეიძე (1941-42), ალექსანდრე ჯორჯაძე (1942-43), გრიგოლ ხოშტარია (1943-46), დიმიტრი იოსელიანი (1946-52), ალექსანდრე ფალავანდიშვილი (1952-64), ვლადიმერ სამსონაძე (1964-73), არჩილ მელია (1973-84), ომარ გოგიაშვილი (1984-2005), დურმიშხან ჩიტაშვილი (2005-06), ჯემალ გუგუშვილი (2006-დან).